Kandidati i grupimit të Foltores i mbështetur nga Sali Berisha në Bashkinë Libohovë, Adil Xhelili, kërkon mendimin e banorëve të kësaj bashkie si orientim për fushastën elektorale të 14 majit. Ai thotë se “pluhuri i harresës 10 vjeçare do të shkundet”. Rivalin e socialistëve pritet ta mësoje në ditët e ardhshme ndërsa garën duket se ia vështirëson jo pak edhe kandidati i fraksionit të vulës, mbështetur nga Lulzim Basha. Argjirolajm.net mëson se emri më i mundshëm është ai i Endrit Hoxhës, megjithatë duhet pritur ende deri në zyrtarizim. Më poshtë thirrja e plotë e Xhelilit për qytetarët e Libohovës.
Të dashur bashkëqytetarë!
Në ditët në vazhdim do të kemi mjaft komunikime intensive si në terren por edhe në rrjetet sociale. Do të doja mendimin tuaj për orientimin e fushatës zgjedhore, për një renditje problematikash dhe mundësi zgjidhjeje, krahas asaj çfarë unë dhe bashkëpuntorët e mi do të ofrojmë për ndryshimin e pritshëm në bashkinë Libohovë. Libohova meriton përfaqësim të vërtetë dhe në dobi të qytetarëve, meriton ndryshimin e shumëpritur, jo pazare të politikës për qëllime ogurzeza. Nepravishta, Zagoria,Suha, Bulua, Labova,Stegopuli, kërkojnë njerëz puntorë për t’u shërbyer banorëve dhe për të ndryshuar pamjen e për të dhënë shpresë. Pluhuri i harresës 10 vjeçare do të shkundet prej këtyre zonave falë përkushtimit tuaj për ndryshim. Shumë shpejt do të bëjmë publik edhe programin për zhvillimin e zonës sonë, duke vënë interesin qytetar në plan të parë. Mirëpres sugjerimet tuaj në koment ose në privat, për të bashkërenduar punën. Një qytetar i mirë është ai që bën nga pak çdo ditë për vendin e tij. Ju faleminderit!
