Baftjar Imeri është fituesi i primareve në Tepelenë. Ai mori 109 vota krahasuar me 71 që mori rivali tjetër Hysni Kasëmi. Në këtë kuptim nëse nuk ndryshojnë gjërat deri më 14 maj, Imeri pritet të jetë rivali i Tërmet Peçit në zgjedhjet lokale. Po kush është ai? Baftjar Imeri vjen nga një familje e njohur në Tepelenë, aty ku ka lindur dhe është rritur. Studimet e larta i kreu në Universitetin e Tiranës për Inxhinieri. Bashkë me të tjerë themeluan degën e PD-së në Tepelenë.
Më pas ai emigroi në Greqi, Angli dhe në Kanada ku jeton prej 20 vitesh. Pak e çuditshme në fakt se si një njeri që ka një jetë stabël në Kanada rikthehet në vendlindje pas kaq shumë vitesh për të kandiduar për kryetar bashkie. Ose jemi para rastit që kemi të bëjmë thjesht me një delirant ose vërtet ai beson se i ka hyrë një gare prej së cilës realisht mund të fitojë diçka.
Tepelena është një bastion i PS-së dhe të fitosh, aq më tepër kur ke shumë kohë i larguar, nuk është një mision i lehtë. Megjithatë ka ende kohë përpara për të parë se si do të rrjedhin ngjarjet. Më poshtë edhe një video-mesazh i përgatitur nga Baftjar Imeri për angazhimin e tij të ri. ©argjiroja.net
