Zv.ministrja e Turizmit dhe Mjedisit, Ornela Çuçi, i është rikthyer deklaratave të saj bërë gjatë kësaj vere përsa i përket raportit me Greqinë dhe influencën kulturore të vendit fqinj në jug të Shqipërisë. E ftuar sërish në Ora News, aty ku pati thënë se nëse në restorantet e jugut ju flasin greqisht refuzoni të merrni shërbimin, sonte Çuçi u shpreh se kishte pare edhe mesazhe kërcënuese pas këtij qëndrimi. Zv.ministrja i referohet kryesisht mesazheve në rrjetet sociale. E pyetur mbi debatin për kufirin detar mes Greqisë dhe Shqipërisë, Ornela Çuçi mohoi që kryeministri Rama të ketë falur det për fqinjët tanë jugor.
“Unë qëllon që të jem edhe te grupi negociator i detit. Është nga njerëzit më patriot dhe më me vizion që unë kam patur fatin të punoj”, iu përgjigj zv.ministrja drejtuesit të emisionit “Expuls”.
Pas deklaratave të saj gjatë verës, OMONIA reagoi ashpër duke thënë ndër të tjera se deklarata si kjo në nivel qeveritar janë një arsye më tepër përse Shqipëria nuk integrohet dot në Bashkimin Europian. Në videon më poshtë shihni intervistën e plotë të zv.ministres Ornela Çuçi.
©argjirolajm.net
