Zjarri në Sarandë, lëndohet një efektiv i Marinës

Një zjarr i fuqishëm shpërtheu gjatë mbrëmjes në Sarandë. Zjarri, shkaqet e të cilit janë të paqarta, është aktivizuar fillimisht në një zonë me shkurre në kepin e Limionit. Për fikjen e tij kanë punuar 2 mjete zjarrfikëse, disa punonjës të repartit të Zjarrfikëseve dhe forca të Marinës. Puna për shuarjen e tij ishte e vështirë për shkak të terrenit dhe errësirës. Gjatë kësaj beteje për fikjen e flakëve të zjarrit, të cilat rrezikonin edhe bazën detare dhe ndërtesat e repartit ushtarak në Limion, është plagosur edhe 1 efektiv i Marinës. Ai është transportuar drejt spitalit të Sarandës për të, marrë ndihmë mjekësore dhe ndodhet jashtë rrezikut për jetën.