12 vite pas drejtimit të Tepelenës, Tërmet Peçi është konfirmuar sërish si kandidat i socialistëve për një mandat tjetër edhe në zgjedhjet e 14 majit 2023. Lajmin e jep Mirela Kumbaro, ministrja e Turizmit dhe njëherazi drejtuesja politike e PS në qarkun Gjirokastër.
“E shtuna në Tepelenë, bashkë me Tërmetin që është kandidati ynë i padiskutueshëm për kryetar bashkie në Tepelenë edhe në 14 maj. Bashkë Laertin, Kleonën dhe Dinon, fillimisht drejt Sinanajt të njësisë Lopës, në bashkëbisedim me banorët për punët e kryera dhe për sa shumë mund të bëjmë ende në mandatin tjetër!”, shkruan Kumbaro.
Tërmet Peçi bëhet kështu kandidati i parë që Kumbaro konfirmon publikisht për bashkitë e qarkut Gjirokastër. Nuk pritet të ketë surpriza as në Përmet me Alma Hoxhën, në Këlcyrë me Klement Ndonin, Gjirokastër me Flamur Golemin e Dropull me Dhimitraq Tolin. PS është në vështirësi në Memaliaj dhe në Libohovë. Kryebashkiaku aktual në Memaliaj, Gjolek Guci, rezulton keq në sondazhet e brendshme të PS, pavarësisht se nuk janë këto matësi i vetëm i performancës e as etaloni i së vërtetës në çdo rast.
Situata për të vështirësohet kur ka përballë edhe një kandidat si Albert Malaj, që në zgjedhjet parlamentare të 2021 dëshmoi se gëzonte një mbështetje të konsiderueshme. Sa i përket Libohovës, Luiza Mandi ka zgjedhur të tërhiqet në mbyllje të mandatit të dytë. PS është në kërkim të një kandidati tjetër, i cili me gjasë nuk do të jetë nga radhët e strukturave partiake e as nga shoqëria civile. Zyrtarizimi i tij do të bëhet në javët e ardhshme. Nuk do të ishte surprizë të kishte një kandidat tjetër edhe në Bashkinë Memaliaj. ©argjirolajm.net
