Partia Demokratike ka nisur procesin e brendshëm të zgjedhjeve dhe propozimeve për kandidatët për deputetë në zgjedhjet e vitit 2021. Ish-deputetë të saj janë deleguar nëpër qarqe e bashki të vendit për të monitoruar këtë proces të rëndësishëm që i paraprin përballjes elektorale mes Bashës e Ramës. I pari shpreson të zgjidhet Kryeministër i Shqipërisë pas 8 vitesh opozitë, ndërsa i dyti kërkon mandatin e tretë për të thyer në këtë mënyrë edhe mitin apo rregullin e pashkruar se palët qeverisin vetëm dy mandate pastaj ndodh rotacioni.
Sa i përket qarkut Gjirokastër, Basha ia ka besuar monitorimin e procesit Ervin Salianjit, ish-deputetit të qarkut Korcë. Ndërkohë për Sarandën, Finiqin, Konispolin, Delvinën e Himarën, puna i është deleguar Romeo Gurakuqit, ish-deputetit të qarkut Shkodër. Dy zyrtarët e lartë të PD-së kanë zhvilluar tashmë takimet e para me strukturat vendore dhe pritet që brenda korrikut të kenë propozimet e anëtarësisë së PD-së për kandidatë për deputetë.
©argjirolajm.net
