Në përfundim të numërimit të votave në Gjirokastër, ministrja Mirela Kumbaro, deputete dhe drejtuese politike e këtij qarku ka falenderuar qytetarët për besimin, duke theksuar se në dhjetë kryebashkiakët më të votuar të 14 majit, 4 i përkasin qarkut të Gjirokastrës. I pari me rezultatin më të mirë në Shqipëri është kryebashkiaku i Tepelenës Tërmet Peçi, i ndjekur nga Dhimitraq Toli i Dropullit.
“Qarku i Gjirokastrës i prin fitores së Partisë Socialiste në gjithë Shqipërinë, sepse mbështet projektet, ekipin, transformimet e mëdha, vizionin dhe kandidatët më të mirë që kryefjalë kanë punën dhe shokun më besnik qytetarin!Me Tërmet Peçin në Tepelenë që mban rekordin kombëtar të këtyre zgjedhjeve të besimit të jashtëzakonshëm me 82,7%, i ndjekur nga një tjetër kryetar pasionant e punëshumë si Dhimitraq Toli i Dropullit, me 81,25% të votave në këtë #14Maj. S’mund të mungonte një zonjë si Alma Hoxha në listën e kryebashkiakëve më të votuar, me 76,8% në Përmet dhe natyrisht as Flamur Golemi i Gjirokastrës me një tjetër rezultat historik prej 70,5%”, thekson në reagimin e saj Kumbaro, e cila shton se Libohova ishte një tjetër bashki ku pati garë të fortë me kandidatin e ri Leonard Hide, ndërsa Klement Ndoni u konfirmua sërish në Këlcyrë.
Nga shtatë bashki në këtë qark, socialistët nuk ruajtën dot Memaliajn, ku Gjolek Guci e pati të vështirë të rikonfirmohej. Gjithsesi, PS në këtë qytet ka fituar shumicën në Këshill Bashkiak, rezultat ky që sipas Kumbaros do të shërbejë për të reflektuar.
“Qytetarët e Memaliajt zgjodhën ndryshe, dhe ne i kuptojmë mesazhet e tyre për të reflektuar e për t’u kthyer në Memaliaj më të fortë. E pavarësisht kësaj, edhe në Memaliaj Partia Socialiste do të ketë shumicën e anëtarëve të Këshillit Bashkiak, si siguria më e madhe për të çuar përpara punët e mira për banorët e tij”, përfundon Kumbaro.