Kryebashkiakja e Gjirokastrës, Zamira Rami zgjodhi sot për 8 Mars të shkonte në spitalin “Omer Nishani” dhe maternitetin “Dhimitër Çuçi”, ku në mënyrë simbolike dhuroi ndonjë karafil për disa të sëmurë dhe për nënat e reja. Ndoshta nuk duhet t’i jepet rëndësi lajmit se kryebashkiaken e pështyu një prej pacientëve, po të kemi parasysh se ky lajm është raportuar prej një portali, i cili është organ zyrtar i Partisë Demokratike në Gjirokastër.
Shpesh herë ky portal ka raportuar lajme të rreme për hir të luftës politike. Dhe tjetra, nuk është e vështirë të gjesh njerëz të pakënaqur apo që s’e kanë simpati kryebashkiaken e Gjirokastrës dhe që janë të gatshëm të bëjnë një gjest të tillë. Por sidoqoftë përtej këtij lajmi, të cilin kryebashkiakja e përgënjeshtroi dhe e quajti shpifje, ka diçka tjetër që të bën përshtypje.
Zamira Rama dhuron dot qoftë dhe një karafil të vetëm pa patur me vetë kamerat e televizioneve lokale që ka nën kontroll. Siç shihet nga pamjet që vetë kryebashkiakja e Gjirokastrës i ka postuar në Facebook, tre kameramanë janë në dispozicion të saj. Me skenar dhe regji të përgatitur, fillimisht në dhomë hyjnë kameramanët, pastaj vjen kryebashkiakja me lule në dorë, a thua kemi të bëjmë me ndonjë ngjarje të një rëndësie të veçantë. Përse Zamira Rami nuk i dhuroi lulet pa zhurmë e pa bujë, por ua prishi ndoshta qetësinë pacientëve me një duzinë kameramanësh e fotografësh?
Për çfarë duhet e gjithë kjo shfaqje, i gjithë ky protagonizëm? Në të njëjtën mënyrë veproi edhe te kopshti “Cicërimat”. Mori kamerat me vete dhe “zaptoi” kopshtin për 8 Marsin. Fare mirë lulet dhe dhuratat mund të jepeshin edhe pa kamera e pa bujë. Një gjest human, qoftë dhe për 8 Marsin, ka vlerë edhe nëse nuk del në televizor. Por me sa duket kryebashkiakja e Gjirokastrës ka një varësi të pashpjegueshme ndaj medias, aq sa në fillimet e saj edhe shkarkimet apo emërimet e vartësve, që konsiderohet një punë rutinë, filloi t’i bënte me kamera me vete.
Kujtoni këtu çfarë ndodhi me shkarkimin e Dashamir Qelit. Por më pas u tërhoq nga kjo metodë pasi në opinionin publik u shfaq thjesht si një kryebashkiake arrogante dhe pa etikë. A mos ndoshta Zamira Rami duhet të tërhiqet nga ky sens i lartë protagonizmi, edhe në ato raste kur nuk është e nevojshme, si sot për 8 Marsin? /ArgjiroLajm.net
