Nga Mirela Kumbaro
Një ditë e shënuar sot por edhe me shumë emocion për ta filluar javën me këmbë të mbarë dhe nën shenjën e mjedisit. Sot qeveria shqiptare e deklaroi zyrtarisht “Park Kombëtar” lumin e Vjosës në të gjithë gjatësinë e tij dhe me të tri degët më të rëndësishme që e ushqejnë lumin e fundit të egër në Europë: Drino, Bënçë, Shushicë.
Dy vjet punë intensive, nga i gjithë ekipi i Ministrisë së Turizmit dhe të Mjedisit, nga specialistët e Agjencisë Kombëtare të Zonave të Mbrojtura, nga Agjencia Kombëtare e Planifikimit të Territorit, nga ekspertë vendas e të huaj, të organizatës Patagonia dhe IUCN, me të cilët, hap pas hapi, fshat më fshat, përshkuam të gjithë shtrirjen e mbretëreshës së lumenjve, për ta ruajtur të egër, për ta mbrojtur nga ndërhyrjet që i ndryshojnë natyrën, por edhe për ta përgatitur për zhvillimin e qendrueshëm të ekonomive të zonës, nga Leskoviku e Çarshova e Përmetit deri në Këlcyrë e Tepelënë, Memaliaj e Fier, Vlorë e Gjirokastër, Dropull e Libohovë. Shumë mirënjohje për secilin prej jush.
E paimagjinueshme vite më parë kur nevojat ekonomike orientoheshin nga emergjenca e ditës, sot mbrojtja e mjedisit, ruajtja e biodiversitetit, zhvillimi i turizmit të qendrueshëm e afatgjatë është vizioni ynë. Faleminderit kolegëve të mi të qeverisë me të cilët morëm sot këtë vendim historik! Tani një punë tjetër e rëndësishme na pret në përgatitje të planit të menaxhimit dhe të përgatitjes së projekteve zhvillimore në shërbim të komunitetit.
Në datë 15 MARS, ju presim në Tepelenë aty ky Drino i jep dorën Vjosës, për të kurorëzuar sëbashku me miq e bashkëpunëtorë të Patagonias dhe IUCN (Unioni Ndërkombëtar i Mbrojtjes së Natyrës) Parkun e parë Kombëtar të një lumi të egër në Europë – Vjosa