Karantina mbaroi, zgjedhjet po afrojnë. Vangjel Tavo ka nisur fushatën. Brenda 24 orësh ka dalë në dy intervista në televizion, ka shkruar për plotësimin e 15 kushteve dhe marrjen e presidencës së BE nga Gjermania, si dhe ka bërë një shkrim tjetër për atë që ai e quan ‘rrënim të Gjirokastrës nga Rilindja”. Tek Syri Tv iu ‘përvesh’ qeverisë për menaxhimin e keq të situatës së pandemisë së krijuar nga Covid. Tek Ora News e quajti veten socialist dhe tha se Rilindja është një sekt.
Më tej premtoi se opozita do të bëjë një qeveri “në krah të qytetarëve shqiptarë dhe fshatarëve”, si dhe hodhi akuza për shpërndarjen sipas tij të padrejtë të ndihmave gjatë izolimit për shkak të Covid. “Ndihma morën vetëm besnikët e sektit të rilindjes”, u shpreh Tavo. Natyrisht që ish-deputeti i Gjirokastrës është në të drejtën e vet të bëjë retorikë e propagandë në prag të fushatës. Por së paku të mos bëjë si i ‘virgjër’ në politikë, të mos bëjë sikur ‘zbret’ nga një planet tjetër dhe befas e gjen Shqipërinë të rrënuar, pa shpresë e rrugëhumbur. Vangjel Tavo ka mbi 20 vjet në politikë dhe është po aq me faj sa e gjithë klasa politike në Shqipëri për çdo gjë që shkon keq në këtë vend.
Shqipëria ka sot mijëra probleme për shkak se është marrë peng dhe është vjedhur sistematikisht nga politikanë si Vangjel Tavo etj. Kjo klasë politike të cilës i përket Vangjel Tavo e ka rrënuar Shqipërinë, prandaj retorika e tij sa nga njëra media në tjetrën është e dalë boje dhe nuk impresionon askënd, me përjashtim të atyre pak militantëve të mbetur të LSI-së.
©argjiroja.net
