Ndonëse nuk është një produkt i konsumit të përditshëm, uthulla s’mund të mungojë në kuzhinën tonë, aq më tepër kur ajo prodhohet në mënyrë natyrale. I tillë është rasti i kompanisë “Agro Fruit” në Korçë, e cila ka nisur me prodhimin e uthullës që në vitin 2010 dhe sot pas rreth shtatë vitesh e ka zgjeruar gamën e prodhimit me tre variante të reja: uthullën klasike, uthullën medicinale dhe uthullën me mjaltë.
Uthulla medicinale ka në përbërje të saj bimë medicinale si rigoni, rozmarina, kanella, degëza bredhi apo rozmarina, të cilat janë tejet të pasura me vitaminë C. Kjo lloj uthulle ka aromë të veçantë dhe veti kurative për një sërë sëmundjesh, sidomos për ata që vuajnë nga diabeti.
Ndërkohë uthulla me mjaltë është një patentë shumë e njohur në SHBA dhe natyrisht me veti kurative, jo thjesht për përdorim në kuzhinë. Për shkak të prodhimit në mënyrë natyrale duke u bazuar te një metodikë hungareze, këto lloje uthulle dallojnë shumë nga marka të tjera që mund të jenë në treg, qoftë vendase apo nga ato që futen përmes importit. Kompania “Agro Fruit” në Korçë është një tjetër histori suksesi “Made in Albania”. Nisi fillimisht si një punishte e vogël që merrej me përpunimin e mollës jeshile, për të vijuar më pas me prodhimin e uthullës, e cila jo vetëm është e preferuar në tregun vendas, por eksportohet edhe në shumë vende të tjera të botës. Ky është një rast që mund të frymëzojë të tjerë sipërmarrës vendas për të rritur më tej ndërmarrjet dhe shtuar gamën e produkteve “made in Albania”./SME Albania
