Mjeku 66-vjeçar Ilir Gazeli ndërroi jetë ditën e djeshme në Sarandë si pasojë e një ataku kardiak. Pavarësisht se kishte dalë në pension, Gazeli vijonte punën në shërbim të qytetarëve, për shkak të mungesës së mjekëve specialistë dhe dje pësoi infarkt teksa ishte në krye të detyrës duke u shërbyer qytetarëve në zonën e Dhivrit. Mesazhet prekëse për humbjen e mjekut kanë qenë të shumta. “Një humbje e madhe para kohe, një shok i mirë por edhe një mjek i mirë, ngushëllime familjes” shkruan Sofokli Kumbuli.
“I kobshëm lajmi i ndarjes nga jeta të mjekut delvinjot Ilir Gazeli. Humanizmi, profesionalizmi dhe përkushtimi ishin tiparet e Tij kryesore, të cilat e shoqëruan gjatë gjithë jetës. Keto virtyte e bëjnë kujtimin e Tij të paharruar për komunitetin të cilit i shërbeu me devotshmëri. Ngushellime familjarëve! U prehtë në paqe e dheu i qoftë i lehtë” shkruan Majlinda Qilimi.
Ndërkohë që përveç profesionit si mjek, një qytetar e kujton edhe si kryetarin e parë të degës së PD-së në Delvinë. “Me hidhërim të thellë mësova për ndarjen nga jeta në moshën 66 vjeçare si pasojë e një infarkti kardiak të kryetarit të parë të degës të Partisë Demokratike Delvinë z.Ilir Gazeli. Iliri ishte një drejtues i denjë dhe vizionar, një mjek që shërbeu me përkushtim dhe humanizëm qytetarëve të Delvinës.
Edhe pse ai u largua nga politika aktive për tu përkushtuar profesionit të mjekut duke i shërbyer qytetarëve, unë kam pasur nderin të ndaj momente diskutimi me të, diskutime të cilat më shërbyen shumë në sfidat elektorale. Në emër të degës të Partisë Demokratike Delvinë po i përcjell ngushëllimet më të ndiera familjes dhe të afërmve të tij.I paharruar do të jetë për delvinjotët dhe të gjithë ata që e njohën” shprehet Hari Imeri.
