Tirana ka vijuar përgatitjet edhe dje. Bardheblutë e kanë zhvilluar në mesditë seancën, për t’u dhënë kohë lojtarëve që të festojnë me familjen Ditën e Verës.
Përveç mesfushorit Afrim Taku, mungoi edhe Gentian Muça. Zv / kapiteni po kryen terapi intensive për shpinën dhe thuhet që javën e ardhshme ai mund t’i bashkohet grupit.
I njëjti lajm i mirë vjen edhe për kapitenin. Erando Karabeci vazhdon të stërvitet, dhe megjithatë në fillimjavë pritet që vendoset nën urdhrat e trajnerit Mirel Josa.
Kundër Luftëtarit, bardhebluve do t’u mungojë edhe Merveille Ndockyt, teksa gjendja në kampin kryeqytetas nuk është ndër më të mirat.
Ndeshja Luftëtari-Tirana do të luhet ditën e dielë në orën 14:00 në stadiumin “Gjirokastra” dhe do të transmetohet drejtpërdrejt në SuperSport.
