Pas një viti pune në kushte të vështira pandemie, por edhe përshtatjeje me teknologjinë, qeveria ka vendosur t’i “shpërblejë” mësuesit duke hequr sanksionet në provimin për shtesën në pagë.
Në fund të muajit shkurt, ekspertët e Ministrisë së Arsimit kanë hartuar një udhëzim të ri, të cilin kanë vendosur ta publikojnë këto ditë.
UDHËZIMET
Thelbi i ndryshimit është te mundësia e përsëritjes së provimit, e cila zgjerohet pafundësisht, nga vetëm një herë me udhëzimin e vitit të shkuar. Ky i fundit e vinte nën presion dhe në jo pak raste e nxirrte jashtë loje mësuesin, duke vënë në rrezik vendin e punës. Ai mund të testohej vetëm dy herë dhe pezullohej nga detyra nëse nuk merrte pikët kaluese.
“Kandidatët, për të gjitha kategoritë e kualifikimit profesional, që futen në procesin e kualifikimit, duke filluar nga ky vit, në rast se nuk e kalojnë me sukses provimin, e rijapin provimin detyrimisht në sesionin pasardhës. Kandidatët që nuk paraqiten në provim ose nuk e përfundojnë provimin konsiderohen që nuk e kanë kaluar me sukses atë.
Kandidatët, në rast se nuk e marrin provimin dhe në sesionin pasardhës, pezullohen nga detyra deri në momentin e kalimit të provimit me sukses”, citohet në udhëzimin e vjetër, i cili ndërpret automatikisht marrëdhëniet financiare të mësuesit ngelës, duke e shpallur vendin e tij të lirë, çka rrit jo vetëm përpjekjet për të marrë provimin, por edhe orvatjet për të gjetur një punë të re.
Udhëzimi i ri e thjeshtëzon procesin e madje edhe u jep mundësinë të ritestohen kundrejt sigurimit të një rezultati më të lartë, i cili shënohet në certifikatën e lëshuar në fund.
“Kandidati ka të drejtë të hyjë në procesin e skualifikimit për çdo kategori dhe në rast se nuk e kalon me sukses provimin, hyn në provim në sesionin pasardhës. Kandidati që e ka fituar kategorinë e kualifikimit dhe ka dëshirë të përmirësojë rezultatin, mund të futet në provimin pasardhës”.
Ministria e Arsimit ka shtruar infrastrukturën për zhvillimin e provimit, por nuk ka ende një datë për realizimin e tij, ndonëse zakonisht bëhej në muajt mars-prill. Pandemia, si shumëçka tjetër, ka vështirësuar edhe këtë proces. Sakaq, në faqen zyrtare të agjencisë së sigurimit të cilësisë në arsim janë publikuar programet orientuese, mbi të cilat duhet të mbështeten për të arritur rezultate të kënaqshme. Provimi për kualifikimin siguron, përveç rritjes profesionale, edhe shtesë mbi pagën bazë, e cila përllogaritet mbi 14 mijë lekë, pavarësisht kategorisë. Shtesa shkon nga 700 deri në 2800 lekë.