Nëse nuk do të ishte investigimi i emisionit ‘Stop’, tregtia e makaronave të skaduara do të vazhdonte. Magazina me 18 tonë makarona në Gjirokastër, që i përkiste subjektit ‘Vako Treg” Sh.p.k, do të vijonte punën e qetë, duke bërë para dhe duke helmuar konsumatorët. Të bësh biznes me 18 tonë ushqime të skaduara në mes të Gjirokastrës, natyrisht që duhet të kesh ‘shpatulla të ngrohta’, natyrisht që duhet të kesh fije që të lidhin me pushtetin. Ne nuk e dimë nëse kreu i AKU Gjirokastër, Beso Brahimi, ka qenë në dijeni këtij aktiviteti kriminal që merr jetë njerëzish me ushqime të skaduara. Ne nuk e akuzojmë dot Beso Brahimin nëse i ka ‘shkelur syrin’ këtij biznesi, për aq kohë sa nuk kemi fakte, por i kërkojmë vetëm një gjest moral: dorëheqjen!
AKU Gjirokastër ka dështuar në përmbushjen e misionit të saj për të mbrojtur konsumatorët. Të mos zbulosh një magazinë me 18 tonë ushqime të skaduara që ishin përhapur në shitoret dhe supermarketet e Gjirokastrës, është jo thjesht dështim spektakolar, por një krim kolektiv ndaj konsumatorëve. Nëse nuk do të ishte emisioni ‘Stop’, njerëzit e AKU Gjirokastër do të vazhdonin të merrnin rrogën e mbase ryshfetet, ndërsa ne do të hanim ushqimet e skaduara. Në fakt, shumë prej atyre ushqimeve edhe mbase i kemi ngrënë për gjithë këto kohë pasi subjekti ‘Vaka Treg’ Sh.p.k ka shumë kohë në treg. Nëse Beso Brahimi nuk dorëhiqet, duhet të veprojë Niko Peleshi me shkarkim të tij. Moralisht ai nuk mund të jetë më drejtor i AKU-së që kujdeset për shëndetin e konsumatorëve.
Një ditë më parë AKU Gjirokastër bllokoi dy restorante në Çarshovë të Përmetit, të cilët nuk plotësonin kushtet hiegjeno-sanitare. Bëri publike edhe emrat e subjekteve, si dhe gjobat përkatëse. Sigurisht që bëri shumë mirë. Por t’u hedhësh hi syve njerëzve duke bllokuar kioska nëpër fshatra, thertore të sajuara të ndonjë jabanxhiu dhe nga ana tjetër të tolerosh biznesin kriminal të magazinës me 18 tonë ushqime të skaduara, kjo është një maskaradë që nuk e kemi hak, as nga Beso Brahimi, as nga kreu i AKU-së, Agim Ismaili, as nga Edi Rama dhe nga askush tjetër. Mjaft se po na vrisni!
© ArgjiroLajm.net
