Zbulimi i një grupi të madh njerëzish, trupat e të cilëve mund të kontrollojnë natyrshëm virusin HIV pa marrë ilaçe ka rritur shpresat për një shërim përfundimtar nga kjo sëmundje. BBC raporton se ky studim zbuloi se deri në 4% e njerëzve që bartin HIV-in në Republikën Demokratike të Kongos ishin në gjendje ta mposhtin virusin pa barna specifike.
Në mënyrë tipike, në pjesën tjetër të botës janë më pak se 1% e njerëzve me HIV që janë në gjendje ta bëjnë këtë. Ky zbulim mund të shërbejë si trampolinë për kërkime të mëtejshme për të zhvilluar një vaksinë ose trajtime të reja për të trajtuar virusin që shkakton AIDS, thonë studiuesit.
“Kur pamë për herë të parë të dhënat që vinin nga studimi u habitëm, por ishim gjithashtu të ngazëllyer. Kjo mund të nënkuptojë se kjo është diçka që ne në fakt mund ta shërojmë”, – tha për BBC, Mary Rodgers, shkencëtarja kryesore e studimit.
Ekipi përfshiu shkencëtarë nga kompania farmaceutike Abbott, Université Protestante au Congo, Johns Hopkins, Instituti Kombëtar i SHBA i Alergjisë dhe Sëmundjeve Infektive dhe Universiteti i Misurit të Kansas City.
Dr. Rodgers tha se grupi në Kongo ishte më i madhi i zbuluar në një vend, midis 2.7% dhe 4.3% që mund të mposhtin virusin. Një tjetër grup njerëzish, por vetëm 1% e tyre që jetojnë me HIV në Kamerun u identifikuan gjithashtu se kontrollonin mirë virusin pa ilaçe.
“Kjo nuk është parë kurrë më parë, zakonisht gjenim më pak se 1% e të gjithë njerëzve me HIV që janë në gjendje të mposhutnin virusin natyrshëm” – tha ajo.
Aktualisht, shumica e njerëzve që jetojnë me HIV duhet të marrin ilaçe anti-retrovirale çdo ditë për të kontrolluar virusin dhe për të zvogëluar ngarkesën e tyre virale.
HIV mori vëmendjen e botës në vitet 1980. Që atëherë ka infektuar 76 milionë njerëz ndërsa 38 milionë njerëz jetojnë me virusin. Besohet se virusi e ka origjinën në Republikën Demokratike të Kongos një shekull më parë. ©LAPSI.al
Studimi befasues në Kongo/ Shpresë për zbulimin e ilaçit kundër HIV-AIDS
Related Posts
