Ndeshja më e rëndësishme e kësaj jave është ajo që do të luhet në orën 17:00, në stadiumin “Selman Stërmasi”, ku Partizani pret Luftëtarin. Një sfidë për Europën dhe që i gjen të kuqtë prapa gjirokastritëve në renditje, ndaj dhe fitorja sot për ta është detyrim.
Pak ditë më parë, drejtuesit e Partizanit bënë ndryshime në stol, duke shkarkaur Starovën, për t’ia besuar drejtimin e ekipit Klevis Dalipit. Ky i fundit nuk ka bërë asnjë ndryshim në formacion për ndeshjen e sotme, ku në portë është Hoxha, në mbrojtje Ibrahimi, Belica, Gojkoviç dhe Kotobelli, në mesfushë Batha, Mala dhe Trashi, dhe në sulm Asani, Bardhi dhe Progni.
Nga ana tjetër, Luftëtari vjen sot me një mungesë të rëndësishme në formacion, sulmuesin Vasil Shkurtaj, i cili nuk luajti as ndaj Kamzës për arsye shëndetësore. Trajneri Hasan Lika luan me formacionin e tij të zakonshëm, me Lamçjan në majë të sulmit.
