E diela e 5 marsit në Shqipëri është shpallur Ditë Zie Kombëtare për shkak të aksidentit tragjik në Greqi. Vendimin e njoftoi kryeministri Edi Rama ditën e enjte. Në aksidentin tragjik deri më tani zyrtarizohen të vdekur edhe 4 të rinj shqiptarë. Dy të tjerë konfirmohen si të zhdukur mes dhjetërave të tjerë.
“Tragjedia e Greqisë është edhe tragjedia jonë, dhimbja për jetët e humbura në aksidentin e tmerrshëm është edhe jona dhe ky është një nga ato momente jetësore, kur një humbje e madhe tek fqinji të tregon më shumë se sa njëqind gëzime që jetët tona janë të ndërlidhura pazgjidhshmërisht, e se duhet të bëjmë çmos që t’i bëjmë ato sa më të mira, duke bashkëpunuar gjithnjë e më shumë me njëri-tjetrin❤️ Ditën e dielë Shqipëria do të nderojë me një ditë zie viktimat e tragjedisë, duke u bashkuar simbolikisht me Greqinë mike me flamurin kombëtar të ulur në gjysëm shtize”, shkruante Rama.
Ndërkohë ky vendim i qeverisë shqiptare është raportuar edhe në mediat greke. Vetë Ministria e Jashtme e Greqisë e përshëndeti gjestin solidar të Shqipërisë.
“Faleminderit fqinjëve shqiptarë dhe kryeministrit Edi Rama personalisht që ndau dhimbjen tonë. Jemi thellësisht të prekur”, thuhet në deklaratën e Ministrisë së Jashtme të Greqisë. Shqipëria bëri të njëjtën gjë duke shpallur Ditë Zie Kombëtare edhe për viktimat e tërmetit apokaliptik në Turqi disa javë më parë. ©argjirolajm.net
