Socialistët kanë nisur fushatën në Gjirokastër tashmë edhe me takime në terren me grupe të vogla duke iu përmbajtur kufizimeve të pandemisë së Covid 19. Drejtuesi politik dhe njëherazi Ministri i Brendshëm, Bledi Çuçi, zhvilloi së fundi një takim në fshatin Çepunë të njësisë administrative Cepo.
“Nisa ditën me disa banorë të fshatit Çepunë në Gjirokastër, ku bashkë me kryetarin e bashkisë patëm një diskutim për çështje të ndryshme komunitare të kësaj zone që lidhen me tokat bujqësore, investimet në infrastrukturë etj. Në dallim nga kundërshtarët tanë që i kemi prapa, sepse përballë kemi vetëm të ardhmen dhe nevojën e vazhdueshme për më shumë investime e shërbime publike më të mira, ne nuk shkojmë te njerëzit vetëm kur janë zgjedhjet. Kaq gjë shqiptarët e kanë të qartë, mjafton t’ju kujtoj këtu edhe turin e llogaridhënies publike që ne zhvilluam menjëherë pasi fituam zgjedhjet e vitit 2017, por edhe iniciativa të tjera që adresojnë më mirë shqetësimet reale të njerëzve”, shkruan Ministri i Brendshëm.
Sipas tij sfida e vërtetë e socialistëve në këto zgjedhje është që të mos lejojnë kthimin mbrapa në qeverisjen e PD-LSI.
“Natyrisht që do të ketë edhe të pakënaqur dhe është normale që shqiptarët të presin më shumë nga ne sepse nga kundërshtarët tanë u bë kohë që nuk presin më asgjë. Prandaj sfida që kemi përpara është të mos ia vështirësojmë Shqipërisë të nesërmen duke u kthyer e shkuara e rrëmujës dhe rrënimit #PDLSI . Më 25 prill nuk ka zgjedhje tjetër më të mirë për Shqipërinë veç Partisë Socialiste”, shprehet Çuçi.