Ndërtimi i aeroportit të Gjirokastrës vazhdon të mbetet një ide e largët gjithnjë e më shumë. Ndonëse është folur shpesh për ndërtimin e tij, duket se qeveria shqiptare i ka synimet për në vend tjetër.
Fillimisht projekt-idea u zhvendos për në Sarandë, në fushën e Vrionit. Ndërkohë së fundi flitet për ndërtim aeroporti në qytetin e Vlorës.
Këtë e konfirmon kryeminsitri Rama, i cili përmes një postimi në faqen e tij në Facebook shkruan se po bisedon me presidentin turk për ndërtimin e aeroportit të Vlorës.
“Drekë në Stamboll me Presidentin Erdogan për projektin e aeroportit të Vlorës, linjën ajrore shqiptare e investime të tjera strategjike”, shkruan Rama në Facebook.
Për buxhetin e Shqipërisë dhe fluksin e udhëtarëve të linjave ajrore do të ishte luks ndërtimi dhe vënia në funksionim e aeroportit edhe në Sarandë, Gjirokastër e Vlorë. Thënë kjo, nëse do të vendoset ndërtimi i aeroportit të Vlorës, Gjirokastra do të lihet mënjanë dhe vënia në funksionim e aeroportit ka për të mbetur thjesht një ëndër apo dëshirë./ArgjiroLajm.net
