Kryeministri Edi Rama ishte i pranishëm në prezantimin e strategjisë për bashkinë e Tiranës. Në fjalën e tij kreu i qeverisë bëri thirrje bizneseve private që të vijojnë me rritjen e pagave të punonjësve.
Ai u shpreh se qeveria ka bërë të pamundurën për rritjen e pagave dhe ka dalë edhe jashtë programit që kishin paraqitur për këtë mandat, duke i rritur pagat minimale me 40 mijë lekë.
Thirrja e tij për sipërmarrësit ishte që të deklarojnë pagat e plota, pasi sipas tij nuk duhet të ketë nënpagesë për punonjësit në raport me punën që ata kryejnë.
“Unë besoj se është momenti më kritik në historinë e këtyre transformimeve, pas daljes në rrugën e lirisë dhe të ekonomisë së tregut, që të gjitha palët të bëhen bashkë. Kam parasysh si palë këtu, edhe në radhë të parë të gjithë sipërmarrjen. Jemi në një fazë ku me patjetër duhet të synojmë me këmbëngulje dhe me kurajo, rritjen e vazhdueshme të pagave. Jemi në një fazë ku duhet a konsiderojmë këtë dhe vitet që vijnë si kohën maksimale që kemi për të kapërcyer hendekun që rrezikon të bëhet i pakapërcyeshëm, nëse nuk veprojmë sot.
Sipërmarrja private duhet të bëjë një reflektim pa humbur kohë, sepse duke shtrënguar dorën më shumë se çduhet dhe në vijimësi dhe duke i lënë gjithmonë të fundit ata që në fakt janë të parët fare, pagat për të punësuarit e vet, faktikisht i ka hapur vetes një gropë që nëse nuk nxiton ta mbyllim sot, do bëhet e pambyllshme edhe për disa vite, një gropë që vjen si rezultat i humbjes së kapitalit njerëzor.
Sipërmarrja nuk mund të vazhdojë që t’i japë të punësurve të vet, një pjesë të pagë përmes bankës dhe një pjesë të pagës në dorë. Sipërmarrja nuk mund të vazhdojë që t’i nënpaguajë të punësuarit në raport me atë që është produktiviteti i vet”, u shpreh Rama.