Gjyqtari i Apelit Gjirokastër Tomor Skreli duhet të paraqitet nesër, e hënë 3 shkurt 2020, për tu përballur me Komisionin e Pavarur të Kualifikimit, shkalla e parë e vettingut.
Mirëpo, në një kohë kur KPK e ka thirrur për seancën dëgjimore që do mbahet nesër, mësohet se në 10 dhjetor 2019 gjyqtari Tomor Skreli ka paraqitur dorëheqjen pranë Këshillit të Lartë Gjyqësor. Ai veç postit si gjyqtar i Apelit të Gjirokastrës, është dhe anëtar i Kolegjit Zgjedhor.
Në kërkesën për dorëheqje, Shkreli thotë se ka vendosur të largohet nga detyra për shkak të problemeve shëndetësore. Por, kërkesa e gjyqtarit të Gjirokastrës nuk është marrë parasysh nga Komisioni i Pavarur i Kualifikimit, pasi sipas njoftimit ai duhet të përballet nesër me gjetjet e vettingut në orën 12:00, dhe me trupën gjyqësore që po kryen procesin e rivlerësimit për të, e përbërë nga Olsi Komici, Xhensila Pine dhe Pamela Qirko.
Procesi i vettingut për gjyqtarin Tomor Skrelin ka nisur në mars të vitit 2019, për tre kriteret: analizën e pasurisë, kontrollin e figurës dhe vlerësimin e aftësive profesionale, raporton newsbomb.al.
Tomor Skreli e ka filluar karrierën në sistemin e drejtësisë në vitin 1998. Prej më shumë se 15 vitesh, Skreli ka punuar si gjyqtar dhe kryetar i Gjykatës së Apelit Gjirokastër.
Në deklaratën e parë të vitit 2003, gjyqtari Tomor Skreli zotëronte pasuri familjare me vlerë 5.4 milionë lekë, ndërsa në fund të vitit 2017, pasuria e deklaruar e tij është rritur me 4 herë, duke kapur vlerën e 23.3 milionë lekëve.
Në fund të vitit 2017, pasuria ndahet në 8.8 milionë lekë likuiditete bankare, 7 milionë lekë pasuri të patundshme, rreth 6.1 milionë lekë kursime të akumuluara ndër vite në cash si dhe automjet me vlerë 1.2 milionë lekë.
Të ardhurat familjare për periudhën deklaruese janë 35.5 milionë lekë. Rreth 63% e të ardhurave familjare kanë si burim pagën si gjyqtar të Z. Skreli, ndërsa paga e bashkëshortes zë rreth 17%. Subjekti deklaron gjithashtu të ardhura nga interesat bankare në masën 12% dhe të ardhura nga qiratë rreth 7% të totalit.
Sa i përket gjendjes së kursimeve në cash, subjekti dhe familjarët e tij deklarojnë teprica që në mënyrë të akumuluar kapin vlerën e 6 milionë lekëve deri në vitin 2015. Por pa sqaruar nëse kursimet janë pakësuar apo jo, Shkreli deklaron në vitin 2015 se zotëron në gjendjen cash vetëm 50 mijë lekë.