Pas zgjedhjes së Eri Shehajt në krye të PD Gjirokastër përmes një procesi të organizuar nga Komisioni i Rithemelimit pas të cilit qëndron Sali Berisha, sot njoftohet se është bërë edhe konstituimi i kryesisë së kësaj dege. Po të shohësh mes fotove janë të njëjtët personazhe që kemi parë në këto 9 vite opozitë të PD-së dhe përgjatë qeverisjes që përfundoi në vitin 2013.
Thjesht Dashua ka ndryshuar vendin, nuk është më në krye të tavolinës, por është ulur pak më poshtë. Po kështu edhe Bequa. Mungojnë vetëm ata pak si Taku me shokë, që u rreshtuan pro Lulzim Bashës. Më pak fjalë, s’ka asnjë lajm nga PD-ja e re e rithemeluar në Gjirokastër. Nuk ka prurje të reja, nuk ka profesionistë të rinj që duan t’i qasen kësaj force politike e të shfaqen si alternativë përballë socialisteve në Gjirokastër.
Shohim të njëjtat fytyra që presin me shpresë se një ditë PD-ja do të vijë në pushtet dhe ata do të jenë të parët që do ndajnë vende pune në shtet, tendera apo përfitime të tjera. Në takimin e konstituimit ka shkëlqyer me mungesën e vet Spiro Ksera, ish-ministri i dënuar për korrupsion dhe shpërdorim detyre. PD-ja nuk është në krizë vetëm në Gjirokastër, por kudo tjetër. Ka hyrë në një spirale që nuk është fare çudi të katandiset si PASOK-u në Greqi. Për fat të keq dëmi më i madh i bëhet vendit që lëngon prej vitesh nga mungesa e opozitës. ©argjiroja.net
