Kryeministri Edi Rama u rikthye sot në Tepelenë pas rreth një viti. Për herë të fundit ai ishte aty gjatë fushatës së zgjedhjeve lokale. Ajo që tërhoqi më shumë vëmendje atëhere ishte “prita” që i bënë në rrugën nacionale disa përkrahës të tij dhe kryebashkiaku Tërmet Peci. Rama u prit me këngë polifonike në mes të rrugës, aq sa u detyrua të dilte nga makina dhe të premtonte se pavarësisht që nuk ishte planifikuar një takim elektoral në Tepelenë, ai do të shkonte aty me patjetër.
“Se këta nuk më kishin vënë takim në Tepelenë, por unë nuk iki pa takim në Tepelenë. Në orën 09:00 takim në Tepelenë”, iu tha Rama atyre që kishin dalë në rrugë dhe ashtu ndodhi.
Ndërkohë sot një vit më pas nuk pati një pritje të tillë me këngë polifonike e pompozitet. Kuptohet që për shkak të pandemisë grumbullimi i shumë njerëzve është i ndaluar dhe kryebashkiaku Tërmet Peci nuk mund ta surprizonte ‘komandantin’, sic ai i thërret, me këngë polifonike të Golikut dhe grupit të tij.
©argjiroja.net
