Pasi shfaqej i habitur një ditë më parë në Facebook pse kishte vetëm 3 raste të reja me Covid në Gjirokastër, ngaqë ai me siguri pret shumë më shumë e ndoshta do të shohë spitalet plot me kufoma vetëm që të goditet Rama, sot Tritan Shehu doli para mediave për të mbajtur një monolog të gjatë. Përsëriti të njëjtin refren të këtyre ditëve se rastet me Covid në Gjirokastër u rritën për shkak të paradës me makinat “Retro”. Mbase këtë e ka bindje e s’kemi ç’i bëjmë, ndonëse guxim i madh shumë të përcaktosh me kaq saktësi preçize shkakun e rritjes së rasteve, për një pandemi që ndryshon nga java në javë dhe shumë gjëra sot e kësaj dite janë të panjohura për shkëncëtarët.Por punë për të!
I habitshëm është një fakt tjetër, se si ish-deputeti e quan “aktivitet propagandistik të Rilindjes” ekspozimin e koleksionit të makinave të vjetra. Ku e sheh ai dimensionin propagandistik të këtij aktiviteti, ku thjesht për tre ditë qëndruan në rrugët e kalldrëmta automjete të koleksionistëve privatë nga Shqipëria, Kosova, Maqedonia etj? Çfarë propagande ka në këtë paradë makinash të vjetra, që vetëm sa evokojnë një kohë tjetër dhe tërhoqën vëmendjen e qytetarëve e maksimumi shkrepën ndonjë foto?
Le më pastaj kur Tritan Shehu shprehet i pezmatuar se mes këtyre makinave ishte edhe ajo e diktatorit Enver Hoxha. Tritan Shehu që kohë më parë pozonte i buzëqëshur krah Enverit, sot flet me përbuzje për makinën e tij, e cila ka vetëm vlerë historike dhe si e tillë ishte pjesë e paradës “Retro”. “Festa të krijuara artificialisht” shprehet më tej ish-deputeti i PD-së, a thua se festa quhen vetëm ato të krijuara natyralisht apo që lidhen me një datë simbolike.
Natyrisht që kohët ndryshojnë dhe jeta është më dinamike. S’është mëkat të shpiken apo krijohen festa të reja. Dhe për aq kohë sa ato sjellin vizitorë, ndihmojnë bizneset të gjenerojnë të ardhura, aq më tepër në këtë vit të vështirë, janë të mirëpritura edhe në Gjirokastër. “Retro” është sot një koleksion dhe një markë fantastike, që meriton çdo kompliment të mundshëm e që duhet shëtitur pse jo në çdo qytet të Shqipërisë. Të thuash që parada nuk duhej organizuar në këtë moment, është një gjë që mund të debatohet dhe Tritan Shehu është në të drejtën e vet ta mendojë ashtu.
Pavarësisht se për hir të së vërtetës bëhej fjalë për një aktivitet në ambient të hapur. Por të bërtasësh përditë e ta deklarosh me saktësi absolute se “Retro” solli Covidin në Gjirokastër, kjo është një gjë krejt tjetër që vetëm politikanë të “rënë nga vakti” si Tritan Shehu mund ta thonë, prandaj nuk duhet marrë seriozisht. Madje Tritanin as Dashua që i qëndronte aty në krah ka filluar të mos e marrë seriozisht që pas parjashtimit nga komisioni “Ruli” në PD. Ish-deputeti i Gjirokastrës thjesht ka kapur një cështje dhe do të bëjë politikë sa ta shtyjë dhe ca muaj derisa ta ndajë mendjen Basha nëse do e lerë më në listë apo jo. Në emër të kësaj lufte politike, e quan propagandë cdo aktivitet apo event që organizohet në Gjirokastër. Kjo qasje kaq destruktive, kjo retorikë kaq banale dhe malinjiteti për cdo gjë që bëhet në qytet nga qeveria apo bashkia, ka gjasa që t’i kushtojë PD-së në Gjirokastër edhe në zgjedhjet e 25 prillit.
©argjirolajm.net
