Kryeministri Edi Rama ka dhënë një intervistë gjatë vizitës që ka zhvilluar në Spitalin Rajonal Memorial. I pyetur për kritikat e Metës për vaksinimin e disa personaliteteve, cilësuar nga presidenti si “sekeltivitet”, Rama u shpreh se kreu i shtetit bën deklarata nga këshillat e Peço Vasilit, duke thënë se shëndetësia në kohën kur ministër ishte Vasili ka qenë në kohën më të zezë.
Për Ramën, presidenti Meta flet në emër të shqiptarëve, por se në fakt mbron vetëm interesat e LSI-së.
“Meta është shpërdoruesi i rolit të presidentit. Ai bën deklaratat nga këshillat e Peço Vasilit, dhe koha kur Vasili drejtonte shëndetësinë është koha më e errët e shëndetësisë shqiptare. Vaksinimi do shtrihet në moshat mbi 80 vjeç. Nëse presidenti mendon se Reshat Arabana apo Tinka Kurti nuk duhet të vaksinohen si çdo të moshuar tjetër. Ky njeri është bërë si dordolec që vihen në fusha për të trembur zogj. Meta bën deklarata për shqiptarët, por mendon vetëm për veten. Ne tani kemi garantuar personelin shëndetësor, po nisim me 80-vjeçarët dhe me radhë. Ata thjesht duan të marrin pushtetin e humbur, por s’kanë për ta marrë derisa akoma vijojnë të jenë alternativë”, tha Rama.