Pas rikonfirmimit në krye të qarkut Gjirokastër si drejtuesi politik i Partisë Socialiste, ministri Bledi Çuçi ka nisur takimet në qark për organizimin e strukturave të partisë në funksion të zgjedhjeve të ardhshme parlamentare të 25 prillit. Çuçi ishte sot në Tepelenë e Memaliaj ku mblodhi asamblenë e socialistëve në këto dy qytete. Bashkë me të ishte edhe deputetja Artemis Malo.
“Me socialistët në Tepelenë e Mamaliaj në mbledhjen e Asamblesë, për të folur mbi organizimin e ardhshëm elektoral, i cili do të na çojë në fitoren e zgjedhjeve të 25 Prillit. S’ka asnjë dyshim se Partia Socialiste do t’i fitojë këto zgjedhje sepse është e vetmja alternativë ku shqiptarët besojnë dhe shohin se si vota e tyre nuk shpërdorohet. Vota për ata që kemi përballë është votë e çuar dëm dhe kthim prapa, kthim aty ku ishim 7 vite më parë dhe mos o Zot të kthehemi sërish. PS është gati të fitojë jo thjesht një palë zgjedhje, por dhe të udhëheqë Shqipërinë për një mandat të tretë historik dhe të domosdoshëm për të vijuar me reformat dhe integrimin në Bashkimin Europian. #PërShqipërinëQëDuam #MePartinëSocialiste”, shkruan Çuçi në faqen e tij në Facebook.