Radha e emigrantëve që synojnë të udhëtojnë nga Shqipëria drejt Greqisë, përmes doganës së Kakavijës ka shkuar në disa kilometra. Mësohet se shkak për këtë situatë që po bën që qytetarët të sfiliten me orë të tëra duke pritur, është bërë puna me kapacitet të reduktuar nga pala greke.
Për shkak të situatës së krijuar nga pandemia e Covid-19, pala greke ka vënë kusht për kalimin e kufirit bërjen e testit për çdo qytetar brenda 72 orëve të fundit, dhe kontrollet mjekësore, bëjnë që të ketë vonesa.
Pikat kufitare të Kakavijës dhe Kapshticës janë të mbyllura nga ora 22:00 deri në orën 06:00 që prej 6 gushtit dhe kjo gjë e vështirëson akoma më shumë situatën. Nëse ora 22:00 i gjen emigrantët në kufi, ata do të detyrohen të kthehen pasi pala greke e ka ndaluar edhe pushimin, dhe nesër do të përballen sërish me fluksin e madh.
Ndërkohë, nga data 16 gusht, çdo shtetas që do të hyjë në territorin grek përmes pikës kufitare të Kakavijës dhe Kapshticës do të karantinohet për 7 ditë.
