Performanca në rritje e punës së Policisë së Shtetit duket se ka bindur qeverinë që të miratojë rritjen e pagave për punonjësit e rendit.
Kjo u zyrtarizua ditën e sotme, ku gjatë mbledhjes së Këshillit të Ministrave, qeveria vendosi që të rrisë shpërblimet për punonjësit e policisë, si për orët shtesë dhe ditët e festave, ashtu edhe për punën brenda orarit që kryhet në oraret e vona të mbrëmjes.
Kështu në bazë të vendimit të qeverisë, punonjësit e policisë do të punojnë 40 orë në javë, ku për çdo orë punë apo shërbim që kryhet nga ora 19:00 deri në 22:00, punonjësit e policisë përfitojnë një shtesë page prej 20%.
Rritje page në nivelin 50% do të përfitojnë ata oficerë policie që do të punojnë nga ora 22:00 deri në 6:00 të mëngjesit. Sipas vendimit, për orët e punës gjatë ditëve të festave dhe ato të pushimeve javore punonjësit e rendit do të përfitojnë 25% shtesë page dhe kompensim kohe pushimi të barabartë me shërbimin e kryer jashtë orarit.
Po ashtu punonjësit të Policisë i jepet leje e pagueshme, për rastet, si më poshtë:
a) Martesën e tij 7 ditë;
b) Martesën e fëmijës 5 ditë;
c) Lindjen e fëmijës (baballarët) 3 ditë;
ç) Vdekjen e prindërve, të gjyshërve, të bashkëshortes/it, të fëmijës, vëllezërve, motrave 7 ditë;
d) Ndërrim të banesës 3 ditë;
dh) Sëmundje të rënda të fëmijëve, prindërve 7 ditë;
e) Përgatitjen dhe mbrojtjen e titujve të gradave shkencore për punën që kryejnë 10 ditë.
