Ndërsa opozita pret vendimin shumë të vonuar të Lulzim Bashës për t’u njohur me drejtuesin politik të qarkut Gjirokastër, Partia Socialiste vijon fushatën në terren. Ministri i Brendshën, Bledi Çuçi, ishte sot pasdite në Lunxhëri për një takim me strukturat e partisë në këtë njësi administrative.
I shoqëruar nga kryetari i bashkisë, Flamur Golemi, Çuçi diskutoi çështje të organizimit elektoral për fushatën e cila është atipike për shkak të pandemisë, por edhe periudhës kur zhvillohet. Teksa publikon disa foto nga takimi, Çuçi shkruan se këto zgjedhje janë përballja mes dy botëve.
“Ata përfaqësojnë të shkuarën e rrëmujës dhe rrënimit që Shqipëria e pagoi shtrenjtë. Qeverisja jonë s’ka të krahasuar me katrahurën e atyre. Ata e duan pushtetin në kurriz të shtetit, nuk kanë asnjë lidhje me përgjegjësinë qeverisëse. Sfida jonë më e madhe është të jemi në lartësinë e nevojave të qytetarëve dhe të adresojmë më mirë shqetësimet dhe problemet e tyre, të sigurojmë më shumë investime dhe mundësi punësimi”.
Sipas tij rikonfirmimi i Partisë Socialiste për të vijuar qeverisjen edhe pas 25 prillit s’ka asnjë dyshim.