Në kuadër të Ditës Europiane të Bashkëpunimit u zhvillua sot në Përmet një panair për promovimin e produkteve tipike të zonës, si dhe u zhvilluan vizita në tre projektet e financuara nga programi i BE Intereg IPA Greqi-Shqipëri. Projektet janë restaurimi dhe dixhitalizimi i librarisë së Përmetit, qendra kulturore dhe muzeu i punimeve të gurit. Më pas në mënyrë simbolike u zhvillua edhe rafting në Vjosë, lumin që shtrihet në të dy shtetet fqinje.
Të pranishëm në këto aktivitete ishin zv.ministrja e Jashtme e Shqipërisë, Megi Fino; kreu i Agjencisë Shtetërore të Programimit Strategjik dhe Koordinimit të Ndihmës, Ilir Beqaj, drejtoresha e fondeve IPA të Bashkimit Europian, Kjara Adhami; kreu i Bashkëpunimit në Delegacionin e BE në Tiranë, Hubert Perr; ambasadorja e Greqisë në vendin tonë, Sophia Philippidou, përfaqësues nga autoriteti menaxhues i programit në Greqi dhe kryebashkiakja Alma Hoxha.
Brenda muajit tetor BE do të miratojë programin e ri Intereg IPA Greqi-Shqipëri për periudhën 2021-2027, me një fushë të zgjeruar financimi për projekte të ndryshme në nivel lokal. Bashkitë e qarkut Gjirokastër potencialisht mund të përfitojnë të gjitha nga ky program. Thirrja e parë pritet të hapet në fund të këtij viti. ©argjiroja.net