Bekim Haliaj, presidenti i Luftëtarit, teksa mësoi vendimin e Këshillit Bashkiak të Gjirokastrës për mosakordim të fondeve financiare për klubin e futbollit, ka bërë një reagim në gazetën “Panorama”.
“Luftëtari nuk është i imi dhe i askujt, është i gjirokastritëve. Parë në këtë rrafsh, si president më duhet të them se Bashkia Gjirokastër i detyrohet klubit të Luftëtarit 57 milionë lekë të vjetër, kësti i tremujorit të katërt, si dhe 55 milionë lekë të vjetër të fituara me gjyq të formës së prerë nga Gjykata e Apelit në prillin e vitit 2017. Këto janë detyrimet e Bashkisë Gjirokastër për Luftëtarin”. Gjithsesi, presidenti i skuadrës bluzi falënderon kryetarin e Bashkisë Gjirokastër, Flamur Golemi, për përkushtimin dhe seriozitetin e treguar lidhur me përmirësimin e kushteve të infrastrukturës dhe mbështetjen pa kufi të akademisë së Luftëtarit.
“Në kohën e sotme infrastruktura sportive është primare, pasi mbi ‘shtratin’ e saj ideohet dhe formohet baza e një klubi bashkëkohor. Të jesh në krah të akademisë së Luftëtarit s’ka gjë më të mirë dhe për këtë gjë e falënderoj kryetarin e bashkisë. Unë e kam mik dhe flas çdo ditë. Më vjen mirë që i përkushtohet zbulimit dhe promovimit të elementit të së ardhmes, por kur ekipi nuk garon mes më të mirëve, të rinjtë premtues ku do luajnë. Ndaj, të gjithë së bashku të bëjmë më të mirën për të mbajtur Luftëtarin në Superiore”, vijoi Halilaj.
Sa i përket gjyqeve të fituar nga Luftëtari kundrejt Bashkisë Gjirokastër, nuk është cudi që të jenë dhënë nga ajo kategori gjyqtarësh të cilët së fundi kryeministri Rama i ka pagëzuar me emrin “KÇK” (kap cfarë të kapësh). Ose nëse nuk është ky rasti, kemi të bëjmë me padi të ngritura qëllimisht për të zhvatur para nga arka e Bashkisë Gjirokastër. Gole Tavo e Zamira Rami kanë pasur një raport të mirë mes tyre. Në cdo rast të ndonjë konflikti të mundshëm mund të ishin marrë vesh mes tyre, pa qenë nevoja të shkonin në gjykatë. Për të mos folur pastaj për ‘shkeljet e syrit’ në gjyqe të tilla. Fjala vjen djeg afatet e apelimit, gjoja ngatërron procedurat e plot të tjera si këto.
