Edhe pse formalisht janë në një front opozitar për rrëzimin e Edi Ramës, PD dhe LSI janë në luftë permanente me njëra-tjetrën. Kjo është e dukshme edhe në Gjirokastër, një prej qarqeve ku të dy partitë opozitare garojnë të vetme. Ka një episod të ditëve të fundit që e ilustron këtë fakt. Në dy javët e para të fushatës, Vangjel Tavo është marrë vetëm me denoncime e skenarë imagjinarë të cënimit sipas tij të votës së 25 prillit.
Por retorikës së tij nuk i shkon pas Partia Demokratike, e cila është më shumë e fokusuar te takimet me elektoratin. Pasi Vangjel Tavo denoncoi magazinimin e disa pakove ushqimore, një donacion i bërë prej një kompanie shqiptaro-gjermane për familjet në nevojë në Gjirokastër, kërkoi që edhe Partia Demokratike t’i bënte jehonë kësaj çështje. Pasi hasi ne refuzimin e drejtuesve të PD-së në Gjirokastër dhe vetë Tritan Shehut, Tavo u ankua në Tiranë te numri dy i selisë blu, Sekretari i Përgjithshëm, Gazment Bardhi.
Mësohet se mes Tavos e Bardhit ka pasur një komunikim telefonik pikërisht për këtë zhvillim, por edhe Bardhi e ka anashkaluar duke e deleguar sërish shqetësimin në Gjirokastër. Ky ping-pong i Tavos sa nga Dashua në Gjirokastër te Gazi në Tiranë, dëshmon në fakt se as PD nuk e merr më seriozisht kandidatin e LSI-së, politikanin që hiqet si “fringo i ri”, ndërkohë ka mbi 20 vjet në skenën politike. Edhe për këtë çështje Vangjel Tavo shkoi në polici për të bërë denoncim. Ngaqë nuk e pret më askush, nuk zhvillon dot takime masive, ka shpenzuar dy javë të fushatës duke u marrë vetëm me kallëzime dhe denoncime si fletërrufe thjesht dhe vetëm për të krijuar alibinë e humbjes së 25 prillit.
©argjirolajm.net
