Portieri i Lushnjës, Mikel Spaho, në një prononcim për gazetën “Panorama Sport”, ka folur në lidhje me humbjen që skuadra ka pësuar në Gjirokastër ndaj Luftëtarit.
Mikel Spaho
“Kampionati luhet me pikë dhe rezultati në Gjirokastër e ka lënë ekipin në vendin e fundit duke e mbyllur me humbje fazën e parë. Edhe për mua nuk është diçka e mirë që kam pësuar gjashtë gola në tri ndeshjet e fundit. Nuk dua të justifikohem, por vetëm në pjesën e parë kundërshtari erdhi tri herë i vetëm përballë meje. Duhet të punojmë shumë dhe të gabojmë pak. Jemi me vetëm pesë pikë dhe kjo duhet të na vërë në pozita pune”, tha portieri 35-vjeçar.
“Gardiani” tha se ndiehet më mirë pas përplasjes me shtyllën në episodin e golit të dytë. “E vazhdova ndeshjen. Kam dalë në stërvitje që nga dita e diel dhe kuptohet që jam më mirë. Tani duhet të punojmë që përmes një loje të kujdesshme dhe me sa më pak gabime të t’u rikthehemi pikëve duket filluar që nga mesjava e ardhshme me Vllazninë”, u shpreh Spaho.
PËRGATITJET
Trajneri i Lushnjës Hysen Dedja dhe skuadra e tij verdhejeshile e kanë nisur javën me dy seanca stërvitore. Për lushnjarët kështu do të jetë deri ditën e enjte. Vijojnë të mungojnë Shkullaku dhe Ruço. Të dy futbollistët e Lushnjës kanë konfirmuar se do të zbresin në terrenin stërvitor ditën e mërkurë, pasi janë në periudhë riaftësimi për shkak të dëmtimeve.
