Ministri i Brendshëm Sandër Lleshaj ishte sot në Kakavijë në kuadër të 1 vjetorit të misionit FRONTEX. Gjatë një komunikimi me gazetarët ai u pyet edhe për fenomenin e kultivimit të kanabisit. Lleshaj u pyet edhe për dyshimet se policia e Gjirokastrës fsheh shifrat e vërteta të rrënjëve të kanabisit të kapura gjatë operacioneve.
Pyetje: Të paktën në qarkun e Gjirokastrës mbeten vatra, bashkia e Tepelenës dhe ajo e Këlcyrës, janë raportime që janë bërë ditët e fundit. Dhe ashtu sikundër ju thashë, nuk kemi një shifër reale nga ana e Drejtoria Vendore e Policise. Përse ndodh kjo? Që do të thotë, asgjësohen 2000 bimë dhe deklarohen 180?
Ministri Lleshaj: Çfarë shifre kërkoni! Po kush e ka thënë këtë?
Pyetje: E kanë thënë ata që janë ndjekur penalisht.
Ministri Lleshaj: Për detajet e operacionit të Policisë, mund të kontaktoni Drejtorin e Policisë së Gjirokastrës, i cili mund t’ju japë detaje. Unë nuk kam mundësi të jap detaje, di t’ju them vetëm kaq që objektivi politik i yni është për ta çrrënjosur këtë fenomen, dhe do të çrrënjoset. Kanabisi, dhe gjithë ata që qëndrojnë dhe mbështesin këtë veprimtari kriminale, do të çrrënjosen edhe autorët, edhe bimët së bashku. Faleminderit!
