29-vjeçari i cili i dha fund jetës tragjikisht mëngjesin e kësaj të enjte, duke u hedhur nga kati i tretë i spitalit “Shefqet Ndroqi”, i kthyer në spital COVID 3, është Xhino Koça nga Durrësi. Mësohet se i riu është nipi i humoristit të njohur Roland Koçës, djali i një stilisteje dhe i biri i kryetarit të Njësisë Administrative nr.2, Leonard Koça.
Xhino Koça, sipas spitalit “Shefqet Ndroqi”, po trajtohej prej 4 ditësh me terapinë e plotë të mjekimit dhe gjendja e tij ishte e stabilizuar.
“Lidhur me arsyet që e çuan të riun drejt këtij akti ekstrem, është duke u kryer hetimi nga ana e organeve kompetente”, thuhet në reagimin e spitalit. Ndërsa në rrethana ende të paqarta, mëngjesin e sotëm në orën 04:30 sipas policisë, ai u hodh nga kati i tretë i spitalit. Burime nga spitali bëjnë të ditur se i riu kishte pasur probleme me frymëmarrjen ditët e fundit.
