Kulbi i futbollit Luftëtari po zhytet keq e mos më keq. Edhe pas largimit të Gole Tavos nga presidenca, problemet financiare janë aty. Sot futbollistët kanë bojkotuar stërvitjen në shenjë proteste për mosmarrjen e rrogave prej disa muajsh. Burime të Argjirolajm.net thonë gjithashtu se edhe trajneri grek i ekipit, qiranë e shtëpisë në Gjirokastër deri më tani e ka paguar vetë.
Në disa raste ai ka paralajmëruar se nëse kjo situatë do të vijojë gjatë, do të largohet nga drejtimi i ekipit. Nuk dihet në këto kushte se si do të veprojë presidenti Bekim Halili dhe administratori Artan Laze. Burimet i thanë Argjirolajm.net se drejtuesit e Luftëtrit kanë mbajtur shpresën tek paratë që mund të japë Bashkia Gjirokastër. Por kryebashkiaku Flamur Golemi e ka thënë publikisht në mbledhje të Këshillit Bashkiak se do të japë para vetëm për Akademinë e Luftëtarit, ndërsa për klubin, 75% e aksioneve të të cilit janë tek privati, nuk ka asnjë detyrim të bëjë pagesa mujore në formën e subvencionit.
Golemi ka kërkuar kryerjen e një auditimi të të gjithë financave që Bashkia Gjirokastër i ka kaluar Luftëtarit në këto vitet e fundit. Ndërkohë qindra milionë lekë janë borxhet që klubi ka ndaj të tretëve, përfshi këtu edhe Tatimet. Nëse kjo situatë vazhdon, gjasat janë që Luftëtari të prekë fundin gjatë këtij sezoni.
©argjiroja.net
