‘Art-tunel’ quhet punimi i realizuar në hyrjen e tunelit antibërthamor në Kalanë e Gjirokastër nga piktori korçar, Olgert Rakipllari. Ai ishte në qytetin e gurtë javën e shkuar në kuadër të projektit ‘Bashkë Art Camp’, me artistë të rinj vendas e të huaj. Rakipllari tregon se ideja për këtë punim i lindi pas temave të sugjeruara nga organizatorët e eventit, interesi për të marrë në studim e tunelet e komunizmit në Gjirokastër, si dhe rijetëzimi i tyre në funksion të turizmit.
“Mbas këtyre studimeve u përpoqa t’i klasifikoj dhe të marrë disa motive nga tradita e këtij qyteti me strukturën, motivet dhe modelet e tyre. Në pjesën që sapo hyn në tunel, për afro 5 metër kam pikturuar dy qilima me motive tradicionale, njëra në krahun e majtë e tjetra në krahun e djathtë me lartësi prej 1.5 metra. Përkatësisht pjesa ballore e hyrjes për në tunel është mbivendosur një litar ngjyrë blu përreth kontureve të gurit me qëllim që të evidentohen edhe më tepër siluetat e gurit dhe për të thyer ngjyrën gri të saj. Ky litar është dhe një zgjatimi simbolik i qilimit që do të gjeni në brendësi të pikturuar. Qëllimi i projektit tim është që të vlerësoj dhe riinterpretoj këto hapsira me elementet e tyre karakteristike, siç janë dhe punimet tradicionale të këtij qyteti”, thotë Rakipllari.
Shihni më poshtë fotot se si e ka transformuar ai hyrjen e tunelit në Kalanë e Argjirosë.
© ArgjiroLajm.net
