Disa ditë më parë PD Gjirokastër kishte bërë një denoncim gjysmak për blerje votash. Nuk përmendej asnjë emër apo detaje të tjera, thjesht flitej për “drejtues të institucioneve publike” që angazhohen për blerje votash. Dhe si për të thënë që këta nuk e kanë fare seriozisht të bërit opozitë, por thjesht bëjnë sikur, kanë nja dy ditë që kanë zbuluar një super “skandal”, një super “kauzë” me të cilën e dërrmuan fare Flamur Golemin dhe qeverinë.
Një sekretar i PD, Daniel Sino, thotë se ka bërë një investigim dhe ka konstatuar që zyrat e Njësisë Administrative në Lunxhëri e Antigone nuk qëndrojnë hapur përgjatë gjithë orarit zyrtar. Duke lexuar edhe ato 30 sekonda mesazh që ka për të dhënë, do të na thotë që kjo është një shkelje flagrante aq sa meritonte edhe mundimin për të shkuar deri në ato zyra. Natyrisht që s’jemi duke legjitimuar mosrespektimin e orarit zyrtar nga kushdo i punësuar në administratë, por për aq kohë sa shumica e shërbimeve merren online mbase jo në të gjitha rastet është kaq shumë e domosdoshme të mbahen hapur sportelet kot më kot sa për sy e faqe. Nuk ka ndonjë dobi të madhe publike të mbash ca njerëz nëpër zyra qoftë dhe duke mos bërë asgjë.
Problemi nuk është fare pse nëpunësit e bashkisë në Antigone e Lunxhëri nuk i gjen nëpër zyra 8 orë pa lëvizur fare. Ky është një “normalitet” brenda anormalitetit që ne kemi si shtet. Çështja është si mund të jetë kaq shterpë, pa ide e pa grintë PD-ja në Gjirokastër duke u marrë me aspekte shumë të parëndësishme ndërkohë që për gjëra të tjera heshtin apo bëjnë reagime gjysmake si ai për blerje votash. Edhe sikur vetë Flamur Golemi t’i kishte porositur të vepronin në këtë mënyrë, më bukur se kaq s’mund të shtireshin sikur po bëjnë opozitë. Aman ore, bëni pak pushim se u lodhët shumë, e dërrmuat pushtetin me këto “investigime” e “denoncime të forta” si më poshtë. ©argjirolajm.net
