Vendimi i Gjykatës së Apelit për t’i lënë vulën e PD-së, Enkelejd Alibeajt dhe Gazmend Bardhit, si dy njerëzit e Lulzim Bashës, e ka komplikuar më shumë situatën te opozita në prag të zgjedhjeve lokale. Fraksioni i vulës kishte nisur edhe më herët prezantimin e kandidatëve për zgjedhjet lokale në disa bashki të vendit duke lënë të kuptohej se e dinte më herët vendimin.
Pas regjistrimit të pritshëm në KQZ, do të shtohen kandidatët gati në të gjithë bashkitë e vendit. Sa i përket qarkut Gjirokastër, deri më tani të paktën përfliten kandidatë të fraksionit të vulës në Bashkinë Gjirokastër dhe Bashkinë Libohovë. Për Gjirokastrën emrat e mundshëm janë Spartak Drasa dhe Shemsho Lamaj. Për Libohovën është Endri Hoxha. Ky i fundit i kontaktuar nga argjirolajm.net për t’i kërkuar një konfirmim ose jo, dha një përgjigje kontradiktore. Fillimisht as nuk e pohoi, por as nuk e mohoi kandidimin duke u shprehur se “ende s’e ka vendosur”. Më pas e cilësoi përfoljen e emrit të tij si “aludime të pavërteta e muhabete kafenesh”. Drasa e Lamaj nuk ishin të arritshëm për një komunikim deri në momentin e publikimit të këtij shkrimi.
Alibeaj e Bardhi po caktojnë gjithashtu edhe njerëzit e tyre nëpër komisionet e KQZ për procesin zgjedhor. Deri më tani regjistrimi si kandidatë i njerëzve të Foltores në Gjirokastër e Libohovë, Dorjan Lani e Adil Xhelili, është në ngërç. Afati i fundit për regjistrimin e tyre është në fund të muajit mars. Opsioni më i mundshëm për ta dhe gjithë kandidatët e tjerë të grupimit të Berishës mbetet të hyjnë në listat e Partisë së Lirisë të drejtuar nga Ilir Meta. Njësoj si 4 vite më parë edhe këto zgjedhje lokale ka gjasa që të mos jenë normale dhe me një garë të vërtetë. PD vuan vendimin vrastar të Lulzim Bashës për djegien e mandateve dhe bojkotin e zgjedhjeve lokale. ©argjirolajm.net
