Ambasadori Guido De Sanctis, i sapoardhur në vendin tonë për të drejtuar zyrën e OSBE-së, ka zhivlluar ditën e sotme takime në Gjirokastër. Fokusi ka qenë normalisht situata paraelektorale në këtë bashki. Deri këtu nuk ka asgjë të keqe sepse është brenda misionit të vet. Gabimi apo gafa diplomatike, nëse mund ta quajmë kështu, qëndron në faktin e një takimi që ambasadori pati me dy kandidatët dhe kryetarin e “Foltores” në Gjirokastër. Eri Shehaj, Adil Xhelili dhe Dorjan Lani nuk janë zyrtarisht “përfaqësuesit vendorë të Partisë Demokratike” sikundër thotë OSBE në njoftimin e saj.
Misionet diplomatike në vendin tonë deri më tani njohin zyrtarisht si përfaqësues të Partisë Demokratike vetëm Enkelejd Alibeajn dhe grupimin e tij. Rrjedhimisht edhe kandidatët e dalë nga primaret si Xhelili e Lani, por edhe kryetari Eri Shehaj, nuk janë zyrtarisht përfaqësues të PD-së, për aq kohë sa Gjykata e Apelit s’ka dalë me vendim të formës së prerë për çështjen. Ka dy mundësi, ose OSBE po shkon drejt njohjes së “Foltores” si PD-ja e vulës dhe mos të çuditemi fare kur ambasadori të takohet edhe me Sali Berishën ditët e ardhshme.
Ose diplomati italian, në të shtatat e mbërritjes së tij në Tiranë, është ende i painformuar për situatën ligjore në PD. Më shumë gjasa ka të jetë kjo e dyta. Ambasadori Guido De Sanctis është orientuar gabim nga bashkëpunëtorët e tij shqiptarë. Të kuptohemi, s’ka asgjë të keqe që kreu i OSBE të takohet me aktorë të ndryshëm politikë, si Eri Shehaj, Adil Xhelili e Dorjan Lani në këtë rast, por kur i paraqet ata zyrtarisht si përfaqësues të Partisë Demokratike për aq kohë sa gjykata nuk është shprehur, natyrisht që kjo është një gafë. Përfaqësues të grupimit të “Foltores” në PD është një gjë tjetër dhe përfaqësues të Partisë Demokratike është diçka tjetër për aq kohë sa gjykata nuk ka vendosur për vulën dhe ndryshimet statutore të Kuvendit Kombëtar që organizoi Sali Berisha. ©argjiroja.net