Në garën e brendshme për të përcaktuar kandidatin për zgjedhjet lokale të 14 majit, Partia Demokratike nuk ka ende një emër për Bashkinë Dropull. Kryetari Eri Shehaj deklaroi mbrëmjen e sotme se për këtë bashki do të përcaktohet kandidati “pas konsultave me aleatët”. Por cilët janë aleatët? Në fakt janë vetëm 3 personazhe të poltikës nga minoriteti grek; Vangjel Tavo, Vangjel Dule dhe Spiro Ksera. Kandidati i dropullit përballë rivalit të PS-së do të përcaktohet pikërisht nga këta të tre.
Deri më tani dy opsionet në tavolinë janë: Kostando Ksera dhe Vangjel Tavo. E para është bashkëshortja e Spiro Kserës, një pedagoge e gjuhës dhe letërsisë greke në Universitetin “Eqrem Çabej”. Vangjel Tavo është tërhequr plotësisht nga Gjirokastra. Fokusi i vetëm për momentin është Bashkia Dropull, si një mbyllje karriere në vendlindjen e tij, aty ku nisi rrugëtimin e gjatë politikë 20 e kusur vite më parë. Rikthimi i tij nuk është i pamundur dhe mbase i paqortueshëm për aq kohë sa u rikthye edhe Sali Berisha.
Tavo përballë kandidatit të PS-së, i cili ende nuk është zyrtarizuar, por me gjasë do të jetë kryebashkiaku aktual Dhimtraq Toli, e bën garën në Dropull shumë të ashpër. Dihet që pesha e tij elektorale në këtë bashki është e madhe. Por edhe bashkëshortja e Spiro Kserës e mbështetur gjithashtu nga PBDNJ krijon një garë të fortë në Dropull. Mbetet për t’u parë në javët e ardhshme si do të rrjedhin gjërat. ©argjiroja.net
