Nga Mirela Kumbaro
I pari që më ka folur për kinemanë e Përmetit është Ramazan Islami, që të gjithë e njohin si Zani i Kinemasë. Ai ka qenë që prej më shumë se 40 vitesh, dhe mbetet akoma, kinooperatori i kinemasë së qytetit të trëndafilave.🌹
🎥 Ramazan Vjollca Islami
Me pasionin e profesionistit dhe dëshirën e një fëmije ruan me shumë kujdes aparaturat e prodhuara 50 vjet më parë, madje bashkë me gruan janë kujdesur për kinemanë si në vitin e tmerrshëm 97, ashtu edhe në këto vite të fundit kur herë pas herë dyert e kinemasë së vjetër janë hapur për ndonjë shfaqje duke të kujtuar imazhet e filmit të Giuseppe Tornatore-s “Cinema Paradiso”
📍Ndërtesa aktuale e kinemasë është realizuar nga një arkitekt i vjetër që ka lënë gjurmët e veta në Përmet në vitet 70-80’, Ibrahim Emiri.
👉🏻Arkitekt Ibrahim Emiri sjell në kujtimet e veta foto dhe historinë e ndërtimit të kësaj kinemaje të ndërtuar përfundimisht në fillim të viteve 80’ në hyrje të lagjes historike të Përmetit, që së shpejti do t’i nënshtrohet restaurimit të plotë.
Ajo i ka rezistuar kohës vetëm si ngrehinë ndërsa ishte krejt e amortizuar në të gjitha mjediset e brendshme.
👷♀️Projekti i dedikuar i Bashkisë Përmet dhe në bashkëpunim me Cesvi Albania, fitoi financimin nga projekti IADSA i qeverise italiane dhe ka filluar puna për rikonstruksionin dhe përtëritjen e kinemasë së Përmetit.
✅Lajm që e gëzon Zanin e Kinemasë, por edhe të gjithë përmetarët, sidomos fëmijët që më kanë treguar se s’kanë qenë ndonjëherë në kinema.
👉🏻Vitin tjetër, kur kinemaja të mbarojë do të kemi një super program me filma për fëmijë e të rritur. Bashkëpunëtorët dhe miqtë vullnetarë nuk na mungojnë.
