Ish-kryebashkiaku i Vorës, Agim Kajmaku vijon që të jetë në kërkim, pasi Gjykata e Tiranës vendosi masën “arrest me burg” në mungesë.
Që prej ditës së shtunë, policia ka kryer kontrolle në tre banesat e deklaruara të Kajmakut por nuk ka gjetur asnjë gjurmë të tij në asnjë prej tyre. Në një prej banesave në zonën e Fushë-Prezës, është gjetur vetëm djali i tij, i cili është marrë në pyetje nga Policia lidhur me vendndodhjen e të atit.
Ai ka deklaruar se nuk ka asnjë informacion lidhur me vendin ku ndodhet i ati, madje as për nënën e tij, e cila me siguri po shoqëron bashkëshortin.
Sipas kërkimeve në sistemin TIMS, rezulton se ish-kryebashkiaku i Vorës nuk rezulton të ketë dalë jashtë territorit shqiptar.
Prokuroria bëhet me dije se Kajmaku rezulton në kërkim për 3 vepra penale. Sipas dokumentit bëhet me dije se veprat për të cilat akzuzohet ish-numri 1 i Vorës, janë: “Shpërdorimi i detyrës”, “Falsifikimi i vulave, stampave ose formularëve” dhe “Kryerja e funksionit pas dhënies fund të tij”. Në bazë të Kodit Penal, këto vepra janë të rënda dhe dënimi shkon deri në 15 vite burgim.
Dyshimet e prokurorisë janë se Kajmaku ka firmosur shkarkimin nga detyra të dy n/ kryetarëve, pasi KQZ i hoqi mandatin më 1 Nëntor. Avokati i Kajmakut pretendon se këto dy lëvizje janë bërë më 31 Tetor, ndërkohë që bën me dije as ai nuk ka dijeni për vendndodhjen e klientit të tij.
