Qeveria japoneze ka bërë një donacion për Bashkinë Gjirokastër e Libohovë. Është fjala për dy makina teknologjike për pastrimin e mbetjeve urbane si dhe disa koshave. Lajmin e njoftojnë kryebashkiakët, Flamur Golemi e Luiza Mandi përmes faqeve të tyre në Facebook, ku ndajnë edhe foto të nënshkrimit të marrëveshjes me ambasadorin japonez në Tiranë. Donacioni për secilën bashki kap vlerën rreth 82 mijë euro.
“Ky donacion do të ketë ndikim në punën e ndërmarrjeve tona të pastrimit dhe grumbullimit të mbetjeve urbane. Faleminderit qeverisë japoneze!”, shkruan Luiza Mandi, kryetare e Bashkisë Libohovë.
“Jo të gjitha nevojat mund t’i financojmë me buxhetin tonë apo grantet që jep qeveria, prandaj përgjatë këtyre dy viteve në krye të Bashkisë Gjirokastër, kam bërë të gjitha përpjekjet për financime nga projekte të ndryshme ndërkombëtare. Dhe në fakt ia kemi dalë mbanë të sigurojmë mbështetje për disa investime. Shumë më shumë presim të bëjmë duke shfrytëzuar çdo program e asistencë të huaj për qeverisjen lokale”, shkruan kryebashkiaku i Gjirokastrës, Flamur Golemi. ©argjirolajm.net
