Nga Dhimitris Tolis
Mirënjohje kryeministrit Edi Rama, ministres dhe deputetes sonë Mirela Kumbaro dhe Kryesisë së Partisë Socialiste për rikonfirmimin në garën e 14 majit për një mandat të dytë. Besimi juaj është për mua motivim dhe përgjegjësi më e madhe për të vijuar punët e mira që kemi bërë në Dropull përgjatë këtyre 4 viteve të fundit.
Gjithçka kemi bërë deri më tani fshat më fshat, me investime në rrugë, në rrjetin e ujësjellësit, në infrastrukturën bujqësore e në tërësi për shërbime më të mira për komunitetin, janë vërtet tregues domethënës të përkushtimit tonë të përditshëm. Por unë i jam i vetëdijshëm se kaq nuk mjafton dhe se nevojat janë shumë më tepër, prandaj dua të vijojmë të punojmë së bashku. Unë besoj që me punë gjithçka realizohet.
Dropulli ka pasur këto 4 vite vëmendje si asnjëherë më parë nga Qeveria dhe jam besimplotë se kjo mbështetje do të vijojë përsëri. Sfida jonë e përbashkët është të mbajmë Dropullin dhe Pogonin në drejtimin e duhur pas 14 majit. Dropullitët e pogonitët janë aq të mençur për të bërë zgjedhjen e duhur, Partinë Socialiste. Ata e kuptojnë shumë mirë se s’ka asnjë arsye ta çojnë votën dëm dhe të bëjnë eksperimente me opozitën e paaftë të rregullojë së pari “shtëpinë” e vet pastaj të mendojë për Dropullin dhe Pogonin, që s’kanë asnjë mundësi për t’i ofruar diçka më të mirë Dropullit.
Prandaj të dashur miq e banorë të Dropullit e Pogonit, ju ftoj të bashkojmë mendjet dhe zemrat në 14 maj dhe të vijojmë punën bashkë. Kemi ende shumë projekte për të finalizuar. Dropulli, Pogoni s’ka kohë për të humbur, nuk e meriton të kthehet prapa dhe as do të ndodhë. Bashkë do ia dalim të mbajmë Dropullin dhe Pogonin në drejtimin e duhur.
