Një ditë më parë në Bashkinë Gjirokastër janë nënshkruar disa lëvizje të tjera në radhët e drejtuesve. Kështu mësohet se Seit Rondo është larguar nga Drejtoria e Shërbimeve Komunitare Utilitare dhe në vend të tij është emëruar Iljaz Memushi. Më herët Memushi ka qenë përgjegjës në Sektorin e Mirëmbajtjes në Drejtorinë e Arsimit. Memushi është drejtori i tretë i kësaj ndërmarrje të rëndësishme përgjatë tre viteve të mandatit të Flamur Golemit në Bashkinë Gjirokastër.
Fillimisht e nisi me Ylli Muhon dhe pastaj e vijoi me Seit Rondon. Mbetet për t’u parë se sa jetëgjatë do të jetë Iljaz Memushi në krye të kësaj ndërmarrje. Ndërkohë një tjetër emërim është zyrtarizuar. Gazetari Blerim Kore që ka punuar deri më tani edhe si këshilltar i kryetarit të bashkisë, është emëruar drejtor i Turizmit, Trashëgimisë dhe Sporteve në Bashkinë Gjirokastër.
Në fillim të këtij muaji Argjirolajm.net njoftoi emërimin e Ylli Muhos si drejtues i shtëpisë së të moshuarve në Gjirokastër duke iu referuar një njoftimi publik të bashkisë. Por ndërkohë në vizitën e para dy ditëve në këtë rezidencë me rastin e festave të fundvitit, çuditërisht kryebashkiaku Flamur Golemi u shfaq me Arianit Muhon, drejtorin “pa shkëputje nga puna” që është në atë institucion për gati dy dekada e në mos më shumë. Nuk dihet nëse zyrtarizimi i këtij emërimi do të bëhet në fillim të vitit të ri apo bashkia është tërhequr nga largimi i Arianit Muhos ndonëse ai ka mbushur moshën e daljes në pension kohë më parë. ©argjiroja.net
