Ndërmarrja e Trajtimit të Studentëve Sh.a në Gjirokastër i ka kaluar në varësi bashkisë. Me një vendim qeverie të para disa ditëve, 100% e aksioneve të kësaj shoqërie i janë hequr Ministrisë së Financave dhe Ekonomisë, për t’i kaluar në varësi Bashkisë Gjirokastër. Prej rreth 3 vitesh kjo ndërmarrje drejtohet nga Doriana Demo. Shpesh herë ka patur raportime në media për dyshime e akuza konkrete, se po abuzohet me fondet publike, duke nisur që nga rrogat tejet të larta e deri tek investimet.
Dy vjet më parë Drejtoria e Inspektimit Financiar në Ministrinë e Financave nxori një urdhër pas përfundimit të inspektimit të Ndërmarrjes së Trajtimit të Studentëve në Gjirokastër, ku ndër të tjera ishte evidentuar një abuzim financiar në vlerën e rreth 25 milionë lekëve të vjetra nga ish-drejtuesi i këtij institucioni në kohën e LSI-së, Nikolla Buka. Sipas raportit, Nikolla Buka dhe tre nëpunës të tjerë të kësaj ndërmarrje kanë shpërdoruar paratë për naftë, pa provuar me dokumente ligjore pse dhe si është përdorur kjo sasi karburanti. Por abuzimi i njerëzve të LSI-së, punësuar prej Vangjel Tavos në Ndërmarrjen e Trajtimit Studentor në Gjirokastër, nuk mjaftohej me aq.
Sipas raportit në fjalë nuk u provua me asnjë dokument ligjor as riparimi i automjetit ‘Toyota RAV 4’. Vlera e dëmit përllogaritej në rreth 10 milionë lekë të vjetra. Pra, në total ishin rreth 35 milionë lekë të vjetra që nuk dihet se ku përfunduan, ndonëse s’është e vështirë të merret me mend. Asokohe drejtoresha aktuale e kësaj ndërmarrje, Doriana Demo, denoncoi në Facebook paraardhësin e saj edhe për abuzimin me një tender për dyshekët e studentëve.
Ajo madje paralajmëroi që do të bënte kallëzim në Prokurorinë e Gjirokastrës. Por fati i këtyre denoncimeve publike dhe atyre në Prokurori, nuk u mor vesh kurrë. Mbetet për t’u parë nëse tashmë me kalimin në varësi të Bashkisë Gjirokastër, Flamur Golemi do të ndryshojë drejtues dhe bord administrimi, si dhe cfarë do të bëjë me pagat tejet të larta. Në kushtet kur numri i studentëve është i paktë në konvikte, s’ka më nevojë për shpenzime të larta për rroga apo vende pune fiktive.
©argjiroja.net
