Kryetarja e LSI-së Monika Kryemadhi ka postuar një foto me kryetarin e Aleancës për Ardhmërinë e Kosovës (AAK), Ramush Haradinajn dhe bashkëshorten e tij, Anitën. Kryemadhi me anë të një postimi në ‘Facebook’ tregon se kanë patur një bisedë miqësore ku i ka traguar Haradinajt përvojën e sivjetshme nga kampi rinor i LRI-së në Jalë.
“Me Anitën përqafuar, ndërsa me Ramushin gati për një bisedë miqësore për ti treguar përvojën e sivjetshme nga kampi rinor i LRI-së në Jalë.
Surprizën e bukur që zbulova gjatë ditëve të kampit me të rinjtë që e kanë vendosur të punojnë dhe të jetojnë në një Shqipëri evropiane, pa qenë të detyruar të largohen se dikush iu shkatërron ëndrrat, dua ta ndaj me të gjithë.
Nuk mund ti shpëtonin bisedës me Kryetarin e AAK diskutimet mbi zhvillimet në Shqipëri, Kosovë e rajon, dhe mbi rëndësinë që ka për suksesin në sfidat e përbashkëta të së ardhmes krijimi i një lidhje më të fortë mes brezit të ri.
Trojet tona janë të bekuara nga Zoti me bukuri mahnitëse dhe njerëz me karakter të fortë e tradita. Me besim dhe dashuri e ardhmja këtu është si askund tjetër,” shkruan Kryemadhi në postimin e saj.
Por ajo që ra në sy ishte bluza e Haradinajt, që kishte një mesazh për BE-në për të liberalizuar vizat për qytetarët e Kosovës, që të lëvizin të lirë.
