Trajneri i Luftëtarit, Mladen Milinkoviç, mendon se Luftëtari fillimisht duhet të ketë sigurinë e mbijetesës, para se të fillojë të mendojë për një kualifikim të mundshëm në Europë. Tekniku i gjirokastritëve, në “Gol pas Goli”, e pranoi se pika e kthesës në suksesin ndaj Korabit kishte qenë penalltia e humbur nga Hoxhaj, sepse ajo kishte zgjuar ekipin.
Për fitoren e sotme
“Jam dakord që ishte ndeshje shumë e vështirë. Çdo ndeshje kur kundërshtari nuk ka shumë për të humbur është e tillë dhe mendoj se Korabi nuk kishte shumë për të humbur sot. Por nga ana tjetër kishim shumë trysni para kësaj ndeshjeje sepse çdo rezultat përveç fitores do të ishte shumë i vështirë për ne. Mendoj se dominuam pjesën e parë por nuk gjetëm rrugën për të shënuar. 20 minutat e para të pjesës së dytë ishim shumë më mirë dhe fituam ndeshjen”.
Për Europën si objektiv të radhës
“Fillimisht të mbarojmë punën tonë. Kemi avantazh, por nuk jemi të sigurt”.
Për ndryshimin e lojës në të dy pjesët
“Edhe në dy ndeshjet e para ata i humbën të dyja 1-0 ndaj jam dakord që pjesa e dytë ishte shumë më e mirë për ne. Në pjesën e parë u munduam, por luajtëm shumë të ngadaltë në mes. Nuk bëmë asnjë pasim direkt dhe pa të ne nuk jemi aq të rrezikshëm. Më vjen keq për dy kartonët e kuq, se ishte ndeshje korrekte, por këto gjëra ndodhin”.
Për momentet që ndryshuan ndeshjen
“Mendoj se momenti vendimtar ishte humbja e penalltisë. Por ishte shumë mirë psikologjikisht për ne, pas saj luajtëm më shpejt dhe kur luajmë shpejt jemi të rrezikshëm”.
Për fjalët e Mersinit
“Nuk bëra asnjë koment për këtë, sigurisht unë bëj listën kush rri apo largohet. I uroj më të mirën, ai na ka ndihmuar shumë në pjesën e parë, ne vazhdojmë me ato lojtarë që kemi”.
